الأخبار القبطية - بالكلمة ننتصر

السلطانية

الدكتور ماهر حبيب - 6 أبريل 2013

مصر بلد العجايب ومصر فيها البكش على قفا من يشيل إللى يقول لك إحنا إللى خرمنا التعريفة وإللى يقول لك إحنا إللى دهنا الهوا دوكو وعلى نفس السياق حكام مصر الجدد من الإخوان بيقول لك إحنا إللى قفلنا المطار بالليل علشان الطيارات تقدر تطفى النور وهى طايرة وتوفر كهربا ود حا يوفر بنزيم ويرخص أسعار التذاكر وده حا يشجع السياحة فى مصر ... طبعا ده إى كلام فى الهجايص وبكش حكام مصر الجديدة نوفى إللى بتتقدم للأمام على ايد مرسى وإخوانه وشايفين التقدم على أيديهم الدولار بتمانية جنية وبيتقدم بسرعة ناحية العشرة جنية  والكهربا حا تنقطع كل يوم على كل البلد بالتبادل والعدل والمحاكم بتتحرق علشان الناس كلها تتمتع بالعدل الإخوانى وإللى كان عنده دليل على إن الإخوان هم مخترعى معركة الجمل وهما إللى زوروا الإنتخابات الرئيسية وإن شفيق مش مرسى هو الرئيس الشرعى للبلاد كل ده راح فى الوبا زى هنادى تمام وكله بقى تراب ورماد وسلم لى ع العدل والعدالة بعد ما إتحرقت وحصلت حريق القاهرة سنة 52.

ونرجع لموضوع المطار أنا أول ما سمعت الوزير بيقول حا نضرب كرسى فى الكلوب المطارى ونقلب الفرح ضلمه إفتكرته بيهزر أو بينكت لأن الإخوان لقوا إن كوميديا باسم يوسف بتحبب الناس فيه فقرروا إن الوزرا يبقوا ولاد نكته وبعدين يقول لك كنا بنهزر ونموت على نفسنا من الضحك فنحب الوزرا ولاد النكتة وخفة الدم لكن طلع الموضوع مش خفة فى الدم ده طلع إنهم ما عندهومش دم أصلا لما يقفلوا المطار ويبعتوا برسائل سلبية للعالم كله إننا معندناش ناس لا بتسافر ولا تيجى مصر يعنى يا خلق هوووه حا نفهمكم إزاى إن مرسى وإخوانه مش عاوزين سياح ولا رزق لمصر ما هى مصر أصلا مش فى حساباته.

بصوا على مصر من ساعة ما ركبها النحس ممكن حد يقول لى على حاجة واحدة بس طلعت لقدام وإتحسنت عن عهد مبارك ( طبعا من واقع إللى بنشوفه وبدون مكابرة الثورجية والمنظرين إللى ودوا البلد فى ستين داهية إننا من دلوقتى بنقول ولا يوم من أيامك يا مبارك ولو مرسى كمل الأربع سنين مش حا نلاقى فى مصر بشر أساسا لأنهم حا ينقرضوا إما بالموت حسرة أو بالموت فى بلاد غريبة) فلو سمحتوا بلاش تقارنوا مرسى بمبارك لان ده مقارنة ظالمة بين رجل الدولة ورجل العشيرة الجاهلة المتخلفة فإذا كان مبارك طيار محترف فمحمد مرسى ما يفرقش عن إللى إتعلموا يسوقوا الطيارة علشان تخبط فى برجى التجارة.

يلا يا حكومة مرسى إقفلوا المطارعلشان السياح الكفرة ما يجوش مصر وبكده نحارب الرزيلة إقفلوا التليفزيونات علشان الناس ما تعرفش الحقيقة وتنام حاطة فى بطنها بطيخة صيفى إقفلوا الجرايد علشان الناس تحس إن الدنيا ربيع والحياة بقى لونها بمبى  إقفلوا الطرق علشان نمنع الحوادث والناس تموت موتة طبيعية  إقفلوا السكك الحديدية علشان المزلقنات المفتوحة إللى كل يوم والتانى تعمل لكم مصيبة إقفلوا المدارس علشان نوفر ميزانية التعليم ونعالج العجز فى الميزان التجارى إقفلوا الكليات ما هى بتطلع أنصاف متعلمين ولما إتنصحوا عملوا ثورة وجابوا البلد ميتين سنة ورا إقفلوا المستشفيات علشان الناس تموت براحتها وأهو برضه نوفر الميزانية فلو إنتوا عاوزين توفروا فلوس مش كفاية عليكم المطار فشدوا حيلكم فيه حاجات كتيرة عاوزه تتقفل والحاجة الوحيدة إللى مقفولة ومش محتاجة تنفتح هى القفل المصدى إللى موجود جوه الجمجمة الإخونية ما هو أصل القفل مصدى وحتى المفتاح إترمى فى البحر وبلعه قرموط والقرموط بلعه حوت والحوت راح إنتحر على شاطئ مجهول كان مرزوق العتقى رسى عليها فى بحر الظلمات ومعاه السلطانية إللى أنعموا بيها على مرسى إللى إفتكرها إنها تاج تاج عظيم وهى سلطانية ما تنفعش تشترى بيها غير بجنية فول ومعاه بجنية طعمية تغمزهم برغيف مدعوم مليان مسامير علشان نقص الحديد ومبروك عليكم السلطانية وكل سلطانية وإنتوا طيبين

إرسل الموضوع لأصدقائك على الفيس بوك و تويتر


تصفح أيضاً من أرشيف المقالات

مصر تبكي علي الأحداث
قلب الأم
القِدِّيسُ غرِيغُورْيُوسُ النِّيصِيُّ
حماس والإخوان!
رسالة الى الرئيس منصور والدكتو ر حازم الببلاوى

شاهد أيضاً من أرشيف الفيديو

مسلحي داعش بالموصل من 3 إلى 4 آلاف وخمسمائة عنصر
الفرصة الأخيرة للأحزاب بتقديم مشروع القانون الموحد للانتخابات
حلقة عن الأرهاب بالتعاون مع قناه الجديد فى أجرأ الكلام مع طونى خليفة
مصر كل يوم : قناة الجزيرة تأسست لخدمة إسرائيل
مرسي هو المتهم الأول في قضية التخابر والغريب عدم إدراجه بقائمة الإحالة للمفتي

قائمة العار للدول التي تضطهد الأقليات- أغلبها دول اسلامية وبعضها يدعم الارهاب

كوريا الشمالية
السعودية
العراق
ارتريا
افغانستان
باكستان
الصومال
السودان
إيران
ليبيا
اليمن
شمال ووسط نيجيريا
اوزباكستان
قطر
مصر
الأراضي الفلسطينية
بروناي
ماليزيا
أزربيجان
بنجلاديش
الجزائر
الكويت
اندونيسيا
تركيا
البحرين
عمان